Қазақстанда әлеуметтік осал санаттағы азаматтарды тұрғын үймен қамтамасыз етуге бағытталған ауқымды бағдарлама жалғасуда. Президенттің тапсырмасына сәйкес, Үкімет табысы төмен отбасыларға қолдау көрсету үшін кешенді шаралар қабылдап, жалға берілетін тұрғын үйлер салып, ипотекалық несиелерді субсидиялап, жеке тұрғын үй құрылысына арналған жер телімдерін инженерлік инфрақұрылыммен қамтамасыз етуде.
Қазақстан Республикасы Индустрия және құрылыс министрлігінің дерегінше, 2019–2024 жылдар аралығында елде 77 357 жалға берілетін пәтер салынды және сатып алынды. Тек 2025 жылдың алғашқы жартыжылдығында бұл қор тағы 515 пәтермен толықты. Алты жыл ішінде тұрғын үй құрылысына 15,4 трлн теңге, ал биылғы жылдың алғашқы алты айында 1,5 трлн теңге бағытталды.
Мемлекеттік қолдаудың негізгі тетіктерінің бірі — «Отбасы банк» арқылы берілетін жеңілдетілген ипотекалық несиелер. 2019–2024 жылдар аралығында 2% мөлшерлемемен 22 022, ал 5% мөлшерлемемен 58 450 несие берілді. 2025 жылдың бірінші жартыжылдығында қазақстандықтар қосымша 2% мөлшерлемемен 1 245 және 5% мөлшерлемемен 1 893 жеңілдетілген несие рәсімдеген.
Тұрғын үй салумен қатар, жеке тұрғын үй құрылысына арналған жер телімдерін инженерлік-коммуникациялық инфрақұрылыммен қамтамасыз етуге де назар аударылуда. 2019–2024 жылдар аралығында 183 500 жер телімі инфрақұрылыммен қамтылып, елде қолжетімді тұрғын үйдің одан әрі кеңеюіне мүмкіндік жасалды.