Қазақстанда жануарларға қатысты ережелер ресми түрде өзгертілді. Президент Қасым-Жомарт Тоқаев үй жануарларын ұстау тәртібі мен қаңғыбас жануарлар мәселесін реттеуге бағытталған заңға қол қойды.
Жаңа нормалар жануар иелерінің жауапкершілігін күшейтеді. Енді иелері үй жануарларын серуендету және асырау кезінде айналадағы адамдардың қауіпсіздігін қамтамасыз етуге міндетті. Егер жануар адамға немесе мүлікке зиян келтірсе, келтірілген шығын толық өтелуі тиіс.
Аталған заң соңғы уақытта қоғамда қызу талқыланған заңның біріне айналды. Бастапқыда жоба қаңғыбас иттерді ұсталғаннан кейін бірнеше күн ішінде міндетті түрде ұйықтату туралы ұсынысқа байланысты үлкен сынға ұшыраған. Бұл бастама жануарларды қорғаушылар мен қоғам тарапынан қарсылық туғызып, құжат қайта қарауға жіберілген.
Нәтижесінде заңның соңғы нұсқасында жануарларды жаппай эвтаназиялаудан бас тартты. Енді эвтаназия тек ерекше жағдайларда ғана — ветеринар жануардың ауыр дертке шалдыққанын немесе қатты қиналып жатқанын ресми түрде растаған кезде жүргізіледі.
Сондай-ақ қаңғыбас жануарларды анықтау тәсілі де өзгерді. Бұдан былай негізгі өлшем — жануардың чипі немесе тіркеуі емес, иесінің болуы немесе болмауы.
Тағы бір маңызды өзгеріс өңірлердің өкілеттігіне қатысты. Енді жергілікті әкімдіктер мен мәслихаттар нақты өңірдегі жағдайды ескере отырып, қаңғыбас жануарлар санын реттеу тәртібін өз бетінше айқындай алады.
Жекелеген нормалар жеңілдетілгеніне қарамастан, қаңғыбас иттерді қайтарымсыз аулау жүйесі күшінде қалады.