Шығыс Қазақстан облыстық сотының қылмыстық істер жөніндегі сот алқасының төрағасы Әділ Бакин аса ірі көлемде пара алды деген күдікпен ұсталды. Бұл ақпаратты Қазақстан Республикасы Жоғарғы соты растады.
Тергеу мәліметінше, жоғары лауазымды судья қылмыстық іс бойынша тараптардың бірінің пайдасына шешім шығару үшін бірнеше ондаған миллион теңге көлемінде пара алған болуы мүмкін. Күдікті Өскемен қаласында ШҚО бойынша ҰҚК департаменті мен Сот әкімшілігінің ішкі қауіпсіздік қызметі бірлесе жүргізген операция кезінде ұсталды.
Жоғарғы соттың мәліметінше, күдікті мүдделі тараптың пайдасына оң шешім қабылдағаны үшін пара алу кезінде қолға түскен.
Алдын ала ақпарат бойынша, ақша бас бостандығынан айырумен байланысты емес жаза тағайындау үшін берілген болуы мүмкін. Қылмыстық іс қатты пайдалы қазбаларды заңсыз өндіру және өткізу фактілеріне қатысты болған. Сондай-ақ өндірілген шикізаттың бір бөлігі Қытайға заңсыз жеткізілген болуы ықтимал.
Қазіргі уақытта тергеу жалғасып жатыр. Құқық қорғау органдары әзірге істің өзге мән-жайларын жариялаған жоқ және іс бойынша басқа күдіктілердің бар-жоғы туралы ақпарат бермеді.