2025 жылдың тамыз айында Іле өзенінің жағасында орналасқан «Көшпенділер қаласы» декорациялық кешені ресми түрде Қонаев қаласының коммуналдық меншігіне берілді. Бұған дейін нысан Шәкен Айманов атындағы «Қазақфильм» ұлттық киностудиясының қарамағында болған. Сыйға тарту шарты негізінде өткізілгеннен кейін кешен Қонаев қаласының тұрғын үй-коммуналдық шаруашылық бөліміне бекітілді.
Бұл қадам практикалық өзгерістердің бастауына айналды. Нысан қаланың қарамағына өткеннен кейін бірден базалық инфрақұрылымды дамыту жұмыстары қолға алынып, оның шешуші элементі ретінде туристік нысанға апаратын толық асфальтталған жол салынды.
Жол қысқа мерзімде салынды. Құрылыс жұмыстарын «D2 Construction» ЖШС атқарды. Кіреберіс жолдың ұзындығы шамамен 7 шақырымды құрайды, жолдың жүру бөлігі 7 метр, қозғалыс екі жолақ бойынша ұйымдастырылған. Трасса бойымен электр беру желісі тартылып, 130-дан астам көше жарықтандыру тірегі орнатылды, сондай-ақ кешен аумағында автотұрақ салынды.
Іс жүзінде бұл локацияның мәртебесі түбегейлі өзгерді деген сөз. Бұған дейін «Көшпенділер қаласы» қолжетімділігі шектеулі, пайдалану әлеуеті төмен нысан болып келген болса, қала меншігіне беріліп, жол құрылысы аяқталғаннан кейін ол тұрақты, қауіпсіз әрі жыл бойы қатынауға болатын көлік қолжетімділігіне ие болды.
Көшпенділер қаласы көп жылдар бойы өңірдегі туристер ең көп келетін орындардың бірі болғанын айта кеткен жөн. Мұнда Қазақстанның әр өңірінен, сондай-ақ шетелден туристер тұрақты түрде келеді. Сонымен қатар кешен түсірілім алаңы ретінде де белсенді пайдаланылады: мұнда музыкалық бейнебаяндар, көркем фильмдер, жарнамалық роликтер түсіріліп, кәсіби фотосессиялар мен тақырыптық іс-шаралар өткізіледі. Ерекше сәулеті мен табиғи ландшафты бұл аумақты креативті және киноиндустрия үшін сұранысқа ие етсе, салынған жол оны пайдаланудың мүмкіндіктерін едәуір кеңейтті.
Кешеннің жалпы аумағы 5,8 гектарды құрайды, ал қала меншігіне берілген сәттегі баланстық құны 15,4 млн теңге болған. Пайдалану жылдары ішінде декорациялардың бір бөлігі тозғанымен, дәл жолдың салынуы оларды қалпына келтіру, күтіп-ұстау және одан әрі тиімді пайдалану үшін қажетті базалық жағдайды қалыптастырып отыр. Көлік қатынасы мәселесі шешілмейінше, нысанды дамытуға қатысты кез келген жоспардың іс жүзінде жүзеге асуы мүмкін болмас еді.
«Коммуналдық меншікке беру — инфрақұрылымды жедел дамыту — жол салу» тізбегі басқарушылық тұрғыдан ойластырылған әрі жүйелі тәсілді көрсетеді. «Көшпенділер қаласы» осылайша өткеннің енжар мұрасы болудан арылып, қаланың туристік активі санатына өтіп отыр. Енді бұл нысанмен жүйелі және кезең-кезеңімен жұмыс жүргізуге нақты мүмкіндік бар.
Кешеннің алдағы дамуы қаланың қалыптасқан негізді қаншалықты тиімді пайдалана алатынына тікелей байланысты болады. Дегенмен, басты шарт орындалды: нысан нақты құқықтық мәртебеге ие болды, онсыз даму мүмкін емес еді.
