2025 жылдың мамырында қазақстандықтарға Қытайға құс етін экспорттау жоспарланып отырғаны хабарланған болатын. Алайда 2026 жылдың бірінші жартыжылдығында Қытайдан Қазақстанға жеткізілген құс еті мен тағамдық субөнімдердің көлемі 6,7 есе өсті.
2025 жылғы 21 мамырда Қазақстан Республикасының Ауыл шаруашылығы министрлігі мен Қытай Халық Республикасының Бас кеден басқармасы құс етінің өзара саудасы туралы хаттамаға қол қойды. Ведомство бұл келісімді отандық өндірушілердің экспорттық мүмкіндіктерін кеңейтуге бағытталған қадам ретінде таныстырды. Ауыл шаруашылығы министрі Айдарбек Сапаров қазақстандық кәсіпорындар инспекциядан өткеннен кейін Қытайға өнім жеткізуді бастауға болатынын түсіндірген еді.
Inbusiness.kz басылымы Ұлттық статистика бюросының деректеріне сүйеніп хабарлағандай, 2026 жылғы қаңтар-маусым айларында Қазақстан Қытайдан 13,9 мың тонна құс еті мен тағамдық субөнімдерді импорттаған. Осылайша, Қытай елімізге аталған өнім түрлерін жеткізушілер арасында алтыншы орыннан екінші орынға көтерілді.
Бастапқыда келісім қазақстандық өнім экспортының көлемін арттыруға мүмкіндік береді деп күтілген еді. Алайда әзірге кері бағыттағы жеткізілімдердің өскені байқалады. Бұған не себеп? Отандық құс фабрикаларының Қытай нарығындағы сатылым көлемін арттыруына не кедергі? Ауыл шаруашылығы министрлігі бұл мәселелерді қалай шешуді жоспарлап отыр?