Кейбір медициналық ұйымдар зертханалық талдау нәтижелерін танымал мессенджерлер арқылы жолдай бастаған. Ыңғайлы болғанымен, мұндай тәсіл жеке деректердің қорғалуына қатысты елеулі күмән тудырады. Ақпараттың қате мекенжайға жіберілуі немесе серверлері Қазақстаннан тыс орналасқан сервистерді пайдалану құпия мәліметтердің сыртқа таралу қаупін күшейтеді. Бұл туралы Қонаев қалалық көпсалалы ауруханасының зертхана меңгерушісі Салтанат Төлепбергенқызы Дакеева «INFO MONITORING» ақпарат агенттігіне берген сұхбатында айтты.
«Халық денсаулығы және денсаулық сақтау жүйесі туралы» кодексте жеке медициналық деректер науқастың денсаулық жағдайы мен көрсетілген қызметтерге қатысты, кез келген тасымалдаушыда бекітілген мәліметтер деп анықталған. Ал «Жеке деректер және оларды қорғау туралы» заң мұндай ақпаратпен жұмыс істейтін ұйымдарға оны қорғаудың құқықтық, ұйымдастырушылық және техникалық шараларын қолдануды міндеттейді. Медициналық деректермен жұмыс істеу ережелері тек құпиялылықты қамтамасыз ететін және қол жеткізуді бақылауға мүмкіндік беретін қорғалған ақпараттық жүйелерді пайдалануды қарастырады.
Ал мессенджерлер, соның ішінде WhatsApp, бұл талаптарға сай келмейді. Шифрлау мүмкіндігі бар болғанымен, мұндай сервистер қажетті деңгейде қауіпсіздік қамтамасыз етпейді және Қазақстанда медициналық деректермен жұмыс істеуге рұқсат етілген сертификатталған байланыс арналарының тізіміне енгізілмеген.
«Пациенттер өз деректерінің қорғалуына қатысты барлық нормалардың сақталуын талап етуге құқылы. Ең сенімді жол – нәтижелерді медициналық мекемеден жеке алу немесе арнайы әзірленген қорғалған порталдарды пайдалану. Мұндай жүйелер әлі енгізілмеген жерлерде құжаттарды тек қолма-қол алу ұсынылады. Бұл ақпараттың заңсыз таралу қаупін болдырмайды», – деп атап өтті Салтанат Дакеева. Бұл тақырып цифрлық денсаулық сақтау жүйесін дамытудағы ең әлсіз тұстардың бірі болып отыр.