Қазақстанда борышкерлердің банктік шоттарына арест қою тәртібіне өзгерістер енгізу жоспарланып отыр. Жаңа тәсіл бойынша қаражатты толық бұғаттаудан бас тартылып, қолжетімділік тек берешек сомасы шегінде ғана шектелмек.
Әділет вице-министрі Бекболат Молдабековтің мәліметінше, бұл өзгерістер азаматтардан түскен көптеген шағымдарға байланысты қолға алынған. Бұған дейін тіпті аз мөлшердегі қарыз кезінде де шоттар толық бұғатталып, адамдар өз қаражатын пайдалану мүмкіндігінен айырылып келген.
Қазіргі уақытта жүйе жетілдіру кезеңінен өтуде. Нақты тетікті енгізу жоспарланған: тек қарыз көлеміне тең сома бұғатталып, қалған қаражат шот иесінің иелігінде қалады.
Жаңашылдықтар екінші деңгейлі банктермен бірлесіп жүзеге асырылуда. Техникалық жұмыстар жүргізіліп жатқандықтан, жаңа ережелер кезең-кезеңімен енгізіледі.
Әділет министрлігінің атап өтуінше, бұл өзгерістер жүйенің әділдігі мен ашықтығын арттырып, халық тарапынан түсетін шағымдар санын азайтуға бағытталған.