Көпқабатты тұрғын үйлердің тұрғындары кіреберістерді темекі шегетін орын ретінде жиі пайдаланады. Алайда мұндай әрекет көршілерге қолайсыздық тудырып қана қоймай, елеулі әкімшілік жазаға да себеп болуы мүмкін.
Қолданыстағы нормаларға сәйкес, подъездер, баспалдақ алаңдары мен лифтілер қоғамдық орындарға жатады. Сондықтан бұл жерлерде темекі шегуге қатаң тыйым салынған. Тіпті мұндай орында қысқа уақыт темекімен тұрудың өзі заң бұзушылық ретінде есептеледі.
Кіреберісте темекі шеккені үшін 15 АЕК мөлшерінде айыппұл қарастырылған. Қазіргі есеп бойынша бұл — 64 875 теңге. Егер құқықбұзушылық қайталанса, айыппұл көлемі 20 АЕК-ке дейін өсіп, 86 500 теңгені құрайды.
Тыйым тек темекі шегуге ғана қатысты емес. Аулада, кіреберісте немесе баспалдақ алаңында алкогольдік ішімдік ішу де әкімшілік құқықбұзушылық болып саналады. Бұл үшін 5 АЕК көлемінде, яғни 21 625 теңге айыппұл салынады.
Құқықбұзушылық қайталанған жағдайда жаза күшейтілуі мүмкін. Тәртіп бұзушыға 20 сағатқа дейін қоғамдық жұмыс тағайындалуы немесе бес тәулікке дейін әкімшілік қамауға алу жазасы қолданылуы ықтимал.
Тұрғындар ортақ пайдалану орындарында тәртіпті жүйелі түрде бұзатын көршілер туралы учаскелік инспекторға немесе полицияға хабарласа алады.