Конституциялық комиссияның құрамы мен жұмыс форматы Президент Ұлттық құрылтайда жариялаған негізгі идеологиялық ұстанымдарды айқын көрсетеді. Ең алдымен, бұл – Әділетті Қазақстан идеясы мен «Халық үніне құлақ асатын мемлекет» қағидаты.
Комиссия құрамына 120-дан аса адам мүше болды. Олар парламенттік партиялардың өкілдері, заңгерлер мен сарапшылар қауымдастығы, бизнес өкілдері, үкіметтік емес ұйымдар, медиа саласы, ғылым мен мәдениет өкілдері, сондай-ақ өңірлерден келген азаматтар. Мұндай кең ауқым әртүрлі әлеуметтік топтардың мүддесін формалды түрде емес, шынайы тұрғыда қамтуға мүмкіндік береді.
Бұл жерде «Әртүрлі пікір – біртұтас ұлт» қағидаты нақты іске асуда. Көзқарасы, өмірлік тәжірибесі мен кәсіби бағыты әрқилы адамдарды бір ортақ мақсат біріктіреді – қазіргі қазақстандық қоғамның сұранысына сай келетін конституциялық нормаларды қалыптастыру.
Комиссия жұмысының ақпараттық ашықтығы да айрықша мәнге ие. Отырыстардың тікелей көрсетілімі, ресми сайт, арнайы Telegram-арна, сондай-ақ комиссия мүшелерінің әлеуметтік желілердегі белсенділігі қоғаммен тұрақты кері байланысты қамтамасыз етеді. Бұл азаматтар мен сарапшылардың ұсыныстарын кейіннен емес, жұмыс барысының өзінде ескеруге жол ашады.
Осылайша, конституциялық реформа тек элиталық деңгейдегі үдеріс болудан қалады. Ол әкімшілік мақұлдауға емес, қоғамның қатысуы мен түсінігіне негізделген легитимділік қалыптасатын қоғамдық консенсус алаңына айналады.
Дәл осындай тәсіл болашақ өзгерістердің тек құқықтық тұрғыдан ғана емес, қоғамдық тұрғыдан да қабылдануына мүмкіндік береді. Ал бұл – кез келген конституциялық модельдің тұрақтылығы мен тиімділігін айқындайтын басты шарт.