Аягөз қаласындағы №10 мектеп-гимназиясының 10-сынып оқушысы Аружан Қабдулмаратова «Эко асфальт» атты жобаны әзірледі. Жобаның негізінде қайта өңделген пластикті пайдалану арқылы жол жабынын өндіру технологиясы жатыр.
Оқушы бұл идеямен 7-сыныптан бастап айналыса бастаған. Оның жобасы тұрмыстық пластик қалдықтарын қайта өңдеп, асфальт құрамына қосуды ұсынады. Автордың айтуынша, бұл жолдардың беріктігін арттырып, қызмет ету мерзімін ұзартуға мүмкіндік береді. Жол жабынының пайдалану мерзімі 18 жылға дейін жетіп, қолайлы жағдайда 20-25 жылға дейін сақталуы мүмкін.
Сонымен қатар, технология жол материалдарын өндіру шығындарын азайтуға ықпал етеді.
Жоба аясында жолдарды автоматтандырылған бақылау жүйесі де қарастырылған. Тұжырымдама бойынша екі автономды робот жұмыс істейді: бірі жолдағы жарықтар мен зақымдарды анықтаса, екіншісі ақауларды ұзақ жөндеу жұмыстарынсыз жедел қалпына келтіреді.
«Эко асфальт» жобасы пластик қалдықтарын азайтуға және жол құрылысына заманауи экологиялық шешімдерді енгізуге бағытталған.